Malibú visita a protectora de Oroso por Nadal
Malibú continúa levando a cabo accións para cumprir o seu obxectivo: ningún can sen fogar. Para isto desprazouse xunto con Adriana á Asociación GatoCan de Oroso para visitar aos compis peludos que viven alí mentres non atopan unha familia.
Unha protectora familiar
A Asociación GatoCan Oroso ten unhas instalacións orientadas a que os cans e gatos que viven alí poidan estar dun xeito o máis parecido posible a como estarían nunha casa. Con todo, os peludos que alí residen como Dama, Tristán ou Carol están desexando atopar un fogar.
Ademais, e aínda que teñen un patio no que botan moOoito tempo soltos, agora mesmo hai bastantes exemplares, polo que teñen que compartir canil. Sería guaaaauuu atopar un fogar para algúns destes peludiños.
Para botarlle unha pata a esta familia de GatoCan, Malibú, en nome de Casa Grande de Xanceda fíxolles unha doazón económica de 500€ e tamén pienso.
Os animais non son agasallos
Malibú visita protectoras por Nadal para concienciar ás persoas de que os animais non son un agasallo, son unha responsabilidade e un membro máis da familia ao que hai que coidar. Do mesmo xeito, adoptar un peludo implica unha tenencia responsable: identificación, esterilización, vacinas e desparasitación e ir ao veterinario sempre que sexa preciso.
Do mesmo xeito, Malibú e Adriana anímante a colaborar coas asociacións e protectoras mediante voluntariado, acollidas, doazóns ou adopcións. Se queres ser voluntario da Asociación GatoCan Oroso podes poñerte en contacto con eles a través do seu correo.
